Udazkenean Abesbatzak 2011 ekimena aurkeztu dute gaur eguerdian Sanagustin Kulturgunean. Bertan egingo dituzte ekimenaren saio nagusiak, hilaren 29an eta 30ean. Aurkezpenean Julian Barrenetxea Abesbatzako kideak izan dira, baita Urrestillako Abesbatzako Iñaki Odriozola eta Musika Eskolako Mari Jose Bikendi zuzendariak ere.
Urriaren 29an Urrestillako elizan elkartuko dira Julian Barrenetxea eta Urrestillako abesbatzak, eta elkarrekin nahiz bakarka abestuko dute. Hurrengo egunean Haur Abesbatzen Topaketak egingo dituzte Sanagustinen: Ripoll-eko eta Zarauzko abeslariak izango dituzte lagun Antxietakoek. Egun eta toki berean, Asturiasko El Leon de Oro abesbatzak emango du kontzertua. Tolosako kantu lehiaketara etorriko dira, eta Azpeitian geldialdia egingo du Julian Barrenetxea abesbatzako zuzendari Jaime Amenabarren esanetan "Espainiak mailan onenetarikoa" den abesbatzak.
Amenabar, Bikendi eta Odriozola, hirurak oso gustura agertu dira ekimenarekin eta euren arteko harreman eta lankidetzarekin. Herriko abesbatzak 25 urte bete dituela-eta, aurtengo ekimena "berezia" izango dela azpimarratu dute.