Igogailua jarriko dute Ildefonso Gurrutxaga kalearen eta Garate Anaiaren auzoaren artean

Uztarria.eus 2012ko urr. 15a, 13:35
Ildefonso Gurrutxaga kaletik Garate Anaiaren auzunera bitartean dauden eskaileren ondoan jarriko dute igogailua.

Denon Artean parte-hartze prozesuaren baitan eginiko eskaerari erantzuna emanez egingo dute proiektua, eta aste honetan banatuko du Udalak proiektua eraikuntza enpresa desberdinetara. Lanak 2013ko udaberrian bukatzea aurreikusten dute Udal ordezkariek.

Denon Artean parte-hartze prozesuaren baitan eginiko eskaerari erantzuna emanez, Ildefonso Gurrutxaga kaletik Garate Anaiaren auzora oinezkoentzako igogailua jarriko dute. Igogailua kalearen eta auzoaren artean dauden eskaileren ondoan jarriko dute, eta behin igogailua martxan jarrita "inguruak jasaten dituen hainbat arazo ekiditea aurreikusten da", azaldu dute Udal ordezkariek: "Alde batetik, irisgarritasuna hobetuko da, malda handia baitago bi auzoen artean eta bestetik, Paulo VI, Garate Anaiaren, Garmendi eta Urola Ikastola inguruetan dagoen aparkamendu arazoari irtenbidea eman nahi zaio".

Udalak aste honetan banatuko du IMARA Ingeniaritzak egindako proiektua eraikuntza enpresa desberdinetara, eta bi asteren buruan esleitzea espero du. Lanak 2013ko udaberrian, apirila inguruan, amaituko dituzte eta 220.000 eta 260.000 euro bitartean kostatuko dela aurreikusten dute. Gainera, lanak egin ahal izateko, ONCEren 100.000 euroko laguntza eskuratu du Udalak.