Guk ere bozkatzea nahi dugulako, inbidiaz jarraituko dugu Eskozian gertatuko dena; baina noski, era berean, poztasunez. Ospatzeko eguna izango da. Gure senide diren eskoziarrengatik poza adierazteko eguna. Horrez gain, guretzat, eta herri gisa euren etorkizuna erabakitzeko bidean diren guztientzat, pauso garrantzitsua izango da. Herri libre bat izatea amesten dugun guztiontzat, bideak irekiz doaz, eta etorkizuna gure esku dagoenaren eta egon behar duenaren inguruko zalantzarik ez dugu. Abian diren bideek ez dute atzera bueltarik.
Arretaz begiratzen badugu, bai Eskozian eta bai Katalunian, herritarrak izan dira prozesu soberanistak gaur dauden tokira eramatearen protagonista. Herritarrek bultzatu izan ez balituzte, ez leudeke independentziarengandik hain gertu. Horregatik, herritarron ordua da, denon ordua. Bakoitzak dagokigun tokitik ekarpenak egiteko ordua da, Euskal Herria euskaldunok nahi duguna izatea baldin badugu helburu, bederen.
Baina oraingoz, behintzat, zorionak eskoziarrei! Zorionak Eskozia!
Azpeitiko Udal Gobernuko kideak: Eneko Etxeberria, Mikel Ibarzabal, Leire Etxaniz, Aritz Epelde, Kontxita Martija, Ainhoa Beristain, Manuel Unanue, Imanol Amenabar, Marijo Iturria, Iñaki Portilla eta Maialen Agirre.