Azpeitiko Udalak bukatu ditu adinekoentzako Elizkalean egin dituen Biziberri etxe tutelatuak. Bihar, asteartea, ate irekiak izango dira etxeak ezagutu nahi dituzten herritar guztientzat. Bi txanda egongo dira: 10:00etatik 12:00etara bat eta, bestea, 15:00etatik 17:00etara.
Elizkalean daude Biziberri etxe tutelatuak. Hamabi etxebizitza dira denera: logela bakarrekoak dira lau eta bi logelakoak zortzi. Etxe denek dute beren sukaldea, egongela, komuna eta trastelekua. Udalak adierazi duenez, gehienak ezinduentzako egokituta daude, eta beharrezko ekipamendu guztia dute: sukaldea guztiz hornituta, jasotzen den ohea, tele-alarma… Udalak azaldu du, Biziberri etxeetan modu independentean, baina, aldi berean, behar duten laguntza guztiarekin bizitzeko aukera emango dietela adinekoei.