Etxeko txikienei zuzenduta, Gabonetako haur parkea antolatu du aurten ere Bertan Azpeitiko Merkatarien Elkarteak. Ohi bezala, Izarraitz pilotalekuan egongo da, eta puzgarriak, jolasak, giza mahai-futbola eta beste hainbat sorpresa izango dira bertan.\
\
Gaur, abenduak 26, zabalduko dute parkea, eta guztira zortzi egunetan irekiko ditu ateak: abenduaren 26an, 27an, 28an, 29an eta 30ean, eta urtarrilaren 2an, 3an eta 4an.\
\
Aurreko urteetako ordutegia mantenduko da, eta 16:00etatik 20:00etara egongo da zabalik. Sarrera 2 euro izango da eguneko. Parkerako sarrerak doan lortu ahal izango dira Bertan Elkarteko saltokietan erosketak eginda.\