Azpeitia

Azpeitiko herria Urola ibaiaren arroan kokatuta dago, Gipuzkoako erdialde geografikoan

Azpeitia
Azpeitia, Xoxote aldetik ateratako argazkian (Uztarria)

2011ko datuen arabera, Azpeitiak 14.351 biztanle ditu. Horietatik %85 baino gehiago hirigunean bizi dira. Gainontzekoak zazpi auzotan banatuta daude: Izarraitz (270 biztanle), Aratz-erreka (171), Eizagirre (132), Elosiaga (213), Loiola (349), Odria (113), Oņatz (211), Urrestilla (243) eta Nuarben (43). Gaur egun 360 baserri daude Azpeitian.

Azpeitiko populazioa azken hamarkadan poliki-poliki hazten joan da: 1975. urtean 12.209 biztanle, 1981ean 13.196, 2004an 13.893 eta 2011ean 14.351.

Azpeitiak 69,4 kilometro koadro ditu eta hedaduraz Gipuzkoako udalerririk handienetakoa da. Udalerriko azalera gehien aldapatsua da; iparraldetik Izarraizko mendigune zabalak eta hegoaldetik Izazpi eta Irumugarrietako mendizerrak markatzen dituzte mugak. Azpeitiko punturik altuena Erlo mendia da; 1.026 metroko altuera du. Gutxieneko altuera Urola haranean dago —80 metro—, nahiz eta lurraldearen zatirik handiena 200-250 metro bitartean egon. Azkoitia, Deba, Zestoa, Errezil, Bidania, Beasain, Ezkio-Itxaso eta Zumarragarekin egiten du muga.